Her eru úrslitini frá svimjistevnuni í Páls Høll hin 6. mars 2021, sum Suðuroyar Svimjifelag skipaði fyri. Hetta var stevna fyri okkara yngstu aldursbólkar, 1 til 4, har tey heldur serliga svumu uppá tvørs í langhylinum í Vági, nú tað vegna koronatilmælini ikki bar so væl til at hava svimjikapping í skúlahylinum á Tvøroyri.
Her eru startlistarnir til svimjistevnuna sum Suðuroyar Svimjifelag skipar fyri í Páls Høll nú leygardagin hin 6. mars 2021, fyri okkara yngstu aldursbólkar 1 til 4.
SuSvim heilsar:
Orsakað av at tað eru so nógvar tilmeldingar , 115 🙂, mugu vit halda tilmælini so gott, sum tað letur seg gera.
Tí kunnu tey, ið skulu svimja tann seinna partin, ikki sleppa inn í høllina, fyrr enn at hini eru liðug at svimja.
Men upphiting til seinna partin er kl 12:30, so tað skuldi gingið 🙂
Svimjisamband Føroya hevur nú fingið váttan frá umboði fyri Dansk Olympisk Komite / Dansk Idrætsforbund, at svimjistevnan sum Suðuroyar Svimjifelag skipar fyri í Páls Høll hin 10. og 11. apríl 2021, er brúkilig sum eisini úttøkustevna til OL í Tokyo í summar. Hetta sum aftursvar til fráboðan frá okkum, um at FINA hevur góðkent stevnuna til hetta sama.
Hetta er stórur dagur fyri føroyska svimjing, at vit fyri fyrstu ferð í søguni fara at hava eina svimjistevnu í Føroyum, har føroyskir svimjarar (og onnur*) kunnu royna eftir kravtíð til Olympisku Leikir. Vit hava nú arbeitt fram ímóti hesum í rættiliga nógv ár, og verður tað vónandi ein fastur táttur framyvir.
Vegna Svimjisamband Føroya
Rókur
*í prinsippinum er stevnan opin, og kunnu onnur tí eisini koma higar at royna eftir OL-kravtíð – men tá er tað hetta við koronatilmælum og -reglum sum sikkurt órógvar
Her er innbjóðing til svimjistevnu sum svimjifeløgini FLOT, Fuglafjarðar Svimjifelag og Reysti skipa fyri í Klaksvíkar Svimjihøll hin 20. mars 2021. Hetta er stevna fyri okkara yngstu aldursbólkar 1 til 4, ið hesi trý svimjifeløg í felag skipa fyri í Klaksvík, nú tey vegna koronatilmælini illa fáa skipað fyri stevnum í sínum egnu, smáu skúlahallum.
Svimjisamband Føroya skipaði í dag fyri kalendarafundi í hølunum hjá Runavíkar kommunu í Saltangará, har feløgini undir leiðslu av nýggju svimjinevndini løgdu kalendaran fyri svimjiárið 2021-2022, umframt at endurskoða nakrar lutir í kalendaranum nú hesa árshálvu eisini.
Dagførdi kalendarin sæst her á heimasíðu SSF, har nakað av tí mest merkisverda er, at FM á langgeil 2021 nú er flutt til at verða partur av sokallaðu ‘føroysku oyggjaleikunum’ hjá Ítróttasambandi Føroya. Hartil fara vit komandi svimjiár at hava tvær aldursbólkarmeistarastevnur – á stuttgeil um heystið og á langgeil um várið – eins og vit nú hava FM og JM bæði á stuttgeil og á langgeil.
Ein avbjóðing í komandi ári, er at vit ikki enn vita nær heilt víst til dømis nær NM/NJM 2021 verður, og at tað tí heldur ikki er heilt víst nær FM á stuttgeil 2021 verður. Út yvir at vit hava valt at leggja hesa stevnu í desember 2021.
Eitt annað serligt er, at tað til summar stevnur nú er viðmerkt, at talan verður um stevnu við fullari kappingarskrá. Hetta vegna innkomið ynski, til at serliga langteinarar kunnu verða vísir í at kunna royna seg í 800 og/ella 1500 frí.
Sum heild ein sera produktivur dagur, har vit fingu lagt allar heimligu svimjistevnur fram til og við summarið 2022.
Við svimjikvøðu
Rókur
Starvsnevnd SSF hevur samtykt viðfestu úttøkuskipan til komandi EvropaMeistarastevnu á langgeil, sum verður í Budapest í Ungarn frá 17. til 23. mai 2021.
Stutt sagt sama skipan sum til hesa somu stevnu í fjør, at vit ætla at taka út teir báðar svimjarar av hvørjum kyni, sum í kravtíðarskeiðnum klára bestu avrik yvir 700 FINA stig.
Sjálvsagt við fyrivarni fyri, at tað yvirhøvur ber til í hesi koronutíð.
Vegna starvsnevnd SSF
Rókur
You must be logged in to post a comment.