Svimjisamband Føroya

Teir báðir Pauli Ø. Mohr og Pál Joensen svumu báðir fyri Føroyar á evropameistarastevnuni í Budapest í morgun, Pauli í innleiðandi riðlunum av 100 frí, og Pál í innleiðandi riðlunum av 800 frí. Hjá Paula gjørdist tað eitt stórt persónligt met, og hjá Páli rakk tað til finaluna í morgin

Pauli áðrenn 100 frí í Budapest

Continue reading →

Á triðja degi av evropeisku meistarastevnuni í kappsvimjing megnaði Pál Joensen tað sum vit bara tordu at droyma um, at vinna heiðursmerki eisini sum senior. Tíðin 14:56.90 er nýtt norðurlendskt seniormet, og triðbesta tíð í heiminum í ár.

Jón Bjarnason og Pál Joensen eftir 1500 í Budapest

Alt var á gosi við hylin í Budapest, av at síggja tann máta sum føroyingurin taklaði uppgávuna. Søgurnar eru mangar, men til dømis sat sjálvur Vladimir Salnikov og heppaði algoystur upp á Pál, sum í 80-unum vann millum annað tvífalt OL gull á 1500 metra teininum, og sum var fyrsti maður undir 15 minuttir í 1500 metra frísvimjing á langgeil.

Eftir kappingina kom gud og hvør maður yvir til serliga Jón Bjarnason og Jon Hestoy, at ynskja til lukku og siga hvussu imponeraði tey vóru. Russar høvdu tulk við til at fáa sagt hvussu flott hetta var, og fraklendingar vóru skjótir at siga at Pál hevði vunnið kappingina, hevði tað ikki verið fyri Pizzetti.

Tí tað sum hendi var jú, at Pál legði hart út og helt høga ferð allan vegin, til at royna at slíta hinar upp. Fyrstu ferð í finalu á evropeisku seniorkappingini á langgeil, og bara annar tannáringur í riðlinum. Tað helt eisini langt, og slepti meginpartin av riðlinum langt afturum, men tíverri ikki heilt til at sleppa av við italska Pizzetti og franska Rouault.

Miðskeiðis í kappingini roynir Pizzetti so at taka tað aftur sum Pál var komin framum, og fekk eisini minkað munin til bara nakrar kroppslongdir eina løtu. Hann orkaði ikki hetta tempo allan vegin, men hevði roynda Rouault á sleip á alduni hjá sær, sum so kundi leggja á tá ið Pizzetti misti takið.

Franski Sebastien Rouault hevði ein fantastiskan síðsta 200 metur, sum gjørdi at hann ikki bara tók Pál aftur, men eisini legði seg nakrar kroppslongdir framum. Pál bíðaði sum ætlað til síðstu 50 metrar við at seta beinsparkið inn, og svam eisini teir síðstu 50 metrarnar skjótast av øllum, men tá var munurin tíverri ov stórur til at kunna taka gullið.

EM silvurheiðursmerkið hjá Pál

Men øll eru samd um at tað var Pál sum skapti kappingina, íroknað venjarin hjá Rouault. Øll eru samd um at hetta var ein tann harðasti mátin sum man yvirhøvur kundi velja at loysa uppgávuna uppá, og lønin varð tíbetur eisini eitt fantastiska flott silvurheiðursmerki.

Týski Paul Biedermann steðgaði eina góða løtu hjá Pál at tosa, tá ið Pál lá á briksini og fekk massagu eftir kappingina. Hann vann sum kunnugt gull í 200 og 400 frí á heimsmeistarastevnuni í Rom í fjør, har hann sum kunnugt morlaði Michael Phelps í teimum 200. Og hann vann gull í 200 nú beint eftir at Pál hevði svomið.

Danir hava verið og ynskt til lukku, og eisini fraklendingar, týskarar, norðmenn, sviar, íslendarar og øll møgulig. Mantran er “courage”, at tora at leggja út upp á handan mátan, og so klára at halda tempo allan vegin. Eingin man ivast í at Pál kann meira, og eingin kann ivast í at Pál er ein av teimum sum yvirlivdi tapið av superdraktum.

Nú hósmorgun skal Pál svimja innleiðandi 800 metra frísvimjing, og Pauli Ø. Mohr innleiðandi 100 metra frísvimjing. Málið hjá Pál er sjálvsagt at koma í finalu aftur; men uppgávan verður hørð, nú ein rúgva av frískum monnum koma upp í kappingina sum ikki svomu 1500. Pauli fer fyrst og fremst eftir persónligum meti, og kanska eftir metinum hjá Pál á 53.55 sekund.

Vegna Svimjisamband Føroya

Rókur í Jákupsstovu

Budapest

Pál Joensen megnaði í dag at svimja seg víðari til finaluna í 1500 metra frísvimjing, á evropameistarastevnuni í Budapest. Hetta enntá við næstskjótastu tíð av øllum, uttan at hann veruliga spílaði seg út.

Pál í hylinum í Budapest

Tíðin hjá Pál var 15:04.05, sum er skjótasta tíð hann nakrantíð hevur svomið í stuttibuksum. Føroyska metið á 15:02.80 er heldur ikki so langt burtur, sum hann svam í superdrakt á donsku meistarastevnuni í 2009.

Uppgávan var annars rættiliga trupul hjá honum, at hann skuldi svimja skjótt í fyrsta riðli av trimum, til at gerast millum teir átta sum sleppa í finaluriðilin í morgin. Her er sjálvsagt altíð betur at svimja í seinasta riðli, so at man veit hvat teir undanfarnu hava svomið, men Pál og teir máttu altso leggja støðið.

Pál fær massagu eftir 1500

Jón Bjarnason venjari hevði tí givið honum boð um at royna eftir tíðina 15 minuttir og 5 sekund, umframt tað sum nú kravdist til at vinna riðilin. Tað vísti seg at Pál var so nógv sterkastur av teimum sum svomu í fyrsta riðli, og hann kundi tí uttan órógv fara eftir kravtíðini frá Bjarnasyni, sum hann eisini lættliga kláraði.

Næsti riðil kláraði ikki at svimja so mikið skjótt, ella valdi at svimja spakuligari við sats um tó so at sleppa í finaluna. Men í triðja riðli lirkaði italski Samuel Pizzetti við tíðini 15:03.32 seg niður um tíðina hjá Pál, so at Pál endaði við næstbestu tíð av teimum 21 svimjarunum í innleiðandi riðlunum.

Sostatt skal Pál Joensen svimja 1500 metra frí finalu á evropameistarastenuni í Budapest, í morgin klokkan 16:00 føroyska tíð. Málið hjá Svimjisambandinum er rokkið, men dreymurin er sjálvsagt heiðursmerki.

Vegna Svimjisamband Føroya

Rókur í Jákupsstovu

Budapest

Pauli Ø. Mohr í Budapest

Pauli Øssursson Mohr svam í morgun 50 metra firvaldasvimjing á evropeisku meistarastevnuni á langgeil, sum er í Budapest í hesum døgum. Tíðin hjá honum varð 27.02 sekund, ið er flott persónligt met í mun til hansara nú fyrrverandi á 28.21 frá Small States stevnuni í Hafnarfirði í juni mánaða. Ein tíð sum boðar frá góðum, nú hann leygardagin skal svimja sína veruliga sergrein, 50 metra frí. Continue reading →

Nú mánamorgun 9. august byrjar evropameistarastevnan í svimjing á langgeil, sum í ár er í Budapest í Ungarn. Fyri Føroyar luttaka Pauli Ø. Mohr og Pál Joensen, á hesi fyrstu veruliga stóru altjóða svimjistevnu eftir at superdraktirnar eru burtur.

Bjarnason á kantinum í Budapest

Continue reading →