Nú mánamorgun 9. august byrjar evropameistarastevnan í svimjing á langgeil, sum í ár er í Budapest í Ungarn. Fyri Føroyar luttaka Pauli Ø. Mohr og Pál Joensen, á hesi fyrstu veruliga stóru altjóða svimjistevnu eftir at superdraktirnar eru burtur.
Bjarnason á kantinum í Budapest
Pál Joensen luttók í vikuskiftinum í árliga Great Swim tiltakinum í London, sum innboðin altjóða svimjistjørna. Hóast at hetta var fyrstu ferð at Pál royndi seg veruligari “open water” svimjing, so varð úrslitið avbera gott, eitt fjórðapláss í kapping við heimsmeistarar og olympiskar heiðursmerkjavinnarar.
Eyðbjørn og Pál á Jóansøku
Føroysku svimjararnir megnaðu í morgun at seta 4 nýggj føroysk met og 5 føroysk juniormet, á norðurlendsku meistarastevnuni fyri ung, sum hevur verið í Drammen í gjár og í dag. Magnus Jákupsson vann sær hartil silvurheiðursmerki í 50 metra firvaldasvimjing, og bronsuheiðursmerki í 200 metra ryggsvimjing.
NMU liðið
Fyrst setti Magnus Jákupsson úr Havnar Svimjifelag nýtt føroyskt met og juniormet í 50 metra firvaldasvimjing, tá ið hann svam seg til silvurheiðursmerki við tíðini 25.90, har juniormetið hjá honum frá Small States stevnuni í Hafnarfirði herfyri var 26.05, og føroyska metið hjá Kára J. á Høvdanum frá heimsmeistarastevnuni í Rom í fjør summar var 26.03.
Síðani setti Cecilia Eysturdal úr Ægir nýtt juniormet í 400 metra frísvimjing, við tíðini 4:41.07, har juniormetið hjá Moniku Biskopstø úr Ægir var 4:41.81, frá Reykjavík International Games í januar í ár. Tíðin rakk til eitt sættapláss av 12 luttakarum í hesi grein á norðurlendsku meistarastevnuni.
So svam Magnus Jákupsson úr Havnar Svimjifelag seg aftur til føroyskt met og føroyskt juniormet, tá ið hann í 200 metra ryggsvimjing vann bronsuheiðursmerki við tíðini 2:11.26, har føroyska metið hjá Kára J. á Høvdanum frá evropeisku juniormeistarastevnuni í Beograd í 2008 var 2:12.62, og kravtíðin frá heysti 2008 til at kunna seta føroyskt juniormet var 2:11.99.
So setti Tanja Skaalum úr Suðuroyar Svimjifelag føroyskt met og juniormet í 100 metra bringusvimjing, tá ið hon svam teinin uppá 1:17.08, har føroyska metið hjá Maluna V. Bærendsen frá donsku meistarastevnuni í 2008 var 1:17.30, og juniormetið hjá Tanju sjálvari frá Small States stevnuni í Hafnarfirði herfyri var 1:18.10. Eitt flott fjórðapláss til 12 ára gomlu Tanju árgang 1997, við trimum eldru 1996-arum frammanfyri seg, og fimm 1996-arum aftanfyri seg eisini.
Og at enda sorlaðu tær fýra Cecilia Eysturdal, Tanja Skaalum, Turið S. Christiansen og Guðrun Mortensen føroyska landsliðsmetið í 4×200 metra frísvimjing, við at svimja teinin uppá 9:18.40, har føroyska metið hjá Shailu millum Garðarnar, Elspu Mørkøre, Lisbeth L. Joensen og Sáru Ejdesgaard frá íslendsku meistarastevnuni í 2004 var 9:54.55. Ein betring uppá 36.15 sekund, hjá hesum fýra gentum árgang 1996 og 1997, harav tvær fyrst verða veruligir juniorar næsta ár, og hinar báðar í 2012.
Í gjár setti Magnus Jákupsson sum kunnugt føroyskt juniormet í 50 metra ryggsvimjing, tá ið hann vann sær gullheiðursmerki við tíðini 27.68, har juniormetið hjá Kára J. á Høvdanum frá EJM í Beograd í 2008 var 27.89. Umframt at tær fýra Cecilia Eysturdal, Guðrun Mortensen, Tanja Skaalum og Turið S. Christiansen settu føroyskt met og juniormet í 4×100 metra frísvimjing, við tíðini 4:19.01 har føroyska metið og juniormetið frá Small States 2010 var 4:20.30.
So tilsamans settu hesir ungu svimjarar altso fimm (5) føroysk met og sjey (7) føroysk juniormet, hesar báðar dagar í Drammensbadet í Noregi. Hóast tað gekk eitt sindur upp og niður til tíðir, so er hetta eitt avgjørt góðtikið úrslit, hjá hesum svimjarum sum enn ikki hava rokkið veruligan junioraldur, og tó so seta bæði juniormet og seniormet.
Vegna Svimjisamband Føroya
Rókur í Jákupsstovu
Tær fýra Cecilia Eysturdal, Guðrun Mortensen, Tanja Skaalum og Turið S. Christiansen megnaðu her fyri løtu síðani at seta nýggj føroyskt met og juniormet í 4×100 frí, við tíðini 4:19.01 har føroyska metið og juniormetið frá Small States 2010 var 4:20.30. Hetta er avbera gott, tá ið hugsað verður um at tær allar fýra eru undir veruligan junioraldur, og tó so kláraðu at betra um eitt met sum út yvir Guðruna og Ceciliu hevði styrk av teimum báðum eitt ára eldru Poulu Ø. Mohr og Biritu Debes.
Annars er tað ikki gingið heilt eftir vild, hendan fyrsta dagin á norðurlendsku meistarastevnuni fyri ung í Drammen. Út yvir at Magnus Jákupsson vann gull og setti føroyskt juniormet í 50 rygg í morgun, so hava tey tíverri næstan undan uttantak svomið verri enn sínar tilmeldingartíðir, og eru tí eisini dragnað nakað í mun til styrkismetingarnar til meistarastevnuna.
Men vit kunnu tó so staðfesta, at Føroyar ikki longur hoyra til niðast á úrslitalistunum í norðurlendskum meistarastevnum, í øllum førum ikki tá ið tað kemur til hesi ungu. Vit hava vunnið rættiliga nógv av hesum gráu fjórða-, fimta- og sættaplássum, sum ikki geva heiðursmerki, men tó so prógva at tey eru við. Og tá eru kappingarneytarnir ikki hvør sum helst, men í svimjihøpi rættiliga sterkar tjóðir sum Svøríki, Danmark, Noregi og Finnland, ið afturat Ísland og Estland kunnu stilla við tveimum svimjarum í part.
Vegna Svimjisamband Føroya
Rókur í Jákupsstovu
Magnus Jákupsson vann her fyri løtu síðani 50 metra ryggsvimjing á norðurlendsku meistarastevnuni fyri ung, sum er í Drammen í Noregi nú 3. og 4. juli 2010. Tíðin hjá Magnusi var nýtt føroyskt juniormet, 27.68 har juniormetið hjá Kára J. á Høvdanum frá EJM í Beograd í 2008 var 27.89. Tíðin er eisini bara 3 hundrapartar frá føroyska metinum hjá Kára, sum er 27.65 frá HM í Rom í 2009. Eitt einastandandi úrslit hjá unga Magnusi, ið sum kunnugt ikki hevur rokkið veruligum junioraldri enn.
Martin Terp Olesen úr Danmark vann silvur við tíðini 27.81, og Ralf Tribuntsov úr Estlandi bronsuheiðursmerki við tíðini 27.88. Tey kappast víðari nú í morgun, seinnapartin og sunnumorgun, har útlit eru til enn fleiri heiðursmerki, serliga nú eftir at Magnus hevur staðfest sína styrki. Til ber at fylgja við meistarastevnuni á www.svimjing.com/live
Vegna Svimjisamband Føroya
Rókur í Jákupsstovu
Komandi vikuskifti fara 8 føroyskir svimjarar at kappast á Norðurlendsku Meistarastevnuni fyri Ung, sum verður í Drammen í Noregi. Hetta er kapping millum norðurlendsku svimjitjóðirnar annaðhvørt ár, fyri aldursbólkin beint undir junioraldur. Og útlitini eru góð, nú føroysku svimjararnir sambært tilmeldingartíðunum liggja til at kunna vinna bæði gull, silvur og bronsu.
Turið, Guðrun og Tanja á SCSSE 2010
You must be logged in to post a comment.