Svimjisamband Føroya

Tað gjørdist ein rættiliga greiður sigur til íslendingar í ár, tá ið landsdystur var í Laugardalslaug svimjihøllini í Reykjavík, leygardagin, millum Føroyar og Ísland. 98 stig ímoti 80, har føroyingar í fjør vunnu við 101 stigum ímóti 79, men tó á ongan hátt so at føroyingar nú smokkaðu niður í millum. Magnus Jákupsson og Birita Debes settu føroysk met og juniormet í ávíkavist 50 firvald og 100 rygg, og Astrið Foldarskarð og Jón Hofgaard settu hartil juniormet í 50 firvald og 100 metra bringusvimjing.

Continue reading →

Sekstan føroyskir svimjarar fara leygardagin hin 9. oktober kl. 16:00 at kappast á næsta landsdysti ímóti Íslandi, í Laugardalslaug svimjihøllini í Reykjavík. Afturat teimum fara 10 aðrir føroyskir svimjarar við yvir á venjingarlegu, at venja 7 dagar á stuttgeil og langgeil, sum fyrireiking til altjóða kapping.

Continue reading →

Svimjisamband Føroya ætlar í heystferiuni 8. til 15. oktober at senda 26 svimjarar til Íslands, at kappast og venja á stuttgeil og langgeil. 16 av hesum vórðu tikin út á úttøkustevnuni í vikuskiftinum, at umboða Føroyar í landsdysti ímóti Íslandi tann 9. oktober, og hini 10 eru síðani vald út til eisini at luttaka á eftirfylgjandi venjingarleguni, sum fyrireiking til altjóða avbjóðingar.

Tey 16 til landsdystin eru:

• Guðrun Mortensen, Tanja Skaalum, Helena Sævarsdóttir, Pál Joensen, Jón Hofgaard og Eyðbjørn Joensen úr Suðuroyar Svimjifelag
• Turið S. Christiansen, Bjarni M. Petersen og Heðin L. Olsen úr Ægir
• Guðrun Holm Jacobsen, Magnus Jákupsson og Dánjal Hestoy úr Havnar Svimjifelag
• Birita Debes og Astrið Foldarskarð úr FLOT
• Jonna B. Thomsen og Jóhann Heðinsson úr Fuglafjarðar Svimjifelag.

Tey 10 eyka eru:

• Cecilia Eysturdal úr Ægir, Erna Katrin Olsen úr Suðuroyar Svimjifelag og Poula Ø. Mohr úr Fuglafjarðar Svimjifelag, sum hava klárað kravtíð til norðurlendsku juniormeistara- stevnuna (NJM) í desember
• Sofus Bech úr Suðuroyar Svimjifelag, Eva Trygvadóttir úr Ægir og Edit Dahl úr Havnar Svimjifelag, sum eru nær at klára kravtíð til NJM
• Sigmund Mørkøre úr Ægir, Óli Mortensen úr Havnar Svimjifelag, Alvi Hjelm úr Ægir og Markus Joensen úr Havnar Svimjifelag, sum venja fram ímóti norðurlendsku meistarastevnuna fyri ung (NMU) í 2012.

Venjingarlegan í Íslandi er liður í áhaldandi arbeiðnum hjá Svimjisambandi Føroya, at bøta upp á væntandi venjingarumstøður her heima. Hon verður bæði á 25 og 50 metrar geil, eftir umbøn frá venjarunum, av tí at báðar hyljalongdir hava týdning fyri optimala venjing.

Høvuðsvenjarar á leguni verða Petur Heðin á Fløtti úr Ægir og Jón Bjarnason úr Suðuroyar Svimjifelag. Ferðaleiðarar verða Niels Pauli Eysturberg og Eyðun Húsgarð, sum umboð fyri starvsnevnd SSF, og hartil koma Marit Skaalum og Súsanna Mortensen.

Ferðaliðið fer úr Føroyum fríggjadagin 8. oktober, og kemur heim aftur fríggjadagin 15. oktober. Landsdysturin ímóti Íslandi verður leygardagin 9. oktober, í Íslandi, eftir sama leisti sum í Føroyum í fjør, men við eini eitt sindur ørvísi kappingarskrá. Meira verður at frætta um landsdystin, so hvørt sum hann nærkast.

Vegna Svimjisamband Føroya

Rókur í Jákupsstovu

Pauli Ø. Mohr megnaði aftur í dag at upp til sína bestu tíð, hesu ferð í 50 metra frí, og hevur sostatt saman við Páli betrað seg í øllum sum føroyingar yvirhøvur svomu í Budapest. Hetta er einastandandi úrslit, tá ið hugsað verður um at superdraktirnar nú eru burtur, og at flestu av hinum londunum tí hava stórar trupulleikar við at liva upp til gomul úrslit.

Føroyska liðið við hylin í Budapest

Pauli svam teir 50 metrarnar uppá 24.68 sekund, har hann fyrr hevur svomið 24.94 í svimjibuksum, og 24.68 í superdrakt. Pauli svam sostatt nágreiniliga somu tíð sum á evropeisku juniormeistarastevnuni í Prag í fjør, men hesu ferð í stuttibuksum. Ein tangering av síni bestu tíð í síni bestu grein, hóast flestu aðrir svimjarar í heiminum taka til takkar við verri úrslitum.

Saman um tikið svumu teir báðir 6 ferðir í Budapest; Pauli í 50 firvald, 100 frí, 50 bringu og 50 frí, og Pál í 800 og 1500 frí. Hvørja ferð megnaðu teir at svimja bestu tíð ella betur, sum garanterað er eindømi hjá nøkrum landi á stevnuni. Vanliga taka londini nevniliga til takkar við at ein meiriluti av teirra svimjarum kláraði at svimja bestu tíð, men her var tað altso báðir í øllum.

Evropameistarastevnan er av á hesum sinni, tá ið tað kemur til føroyingarnar. Pál Joensen er farin avstað á feriu í nakrar dagar, at kobla so nógv frá svimjingini sum hann nú einaferð kann, meðan restin av liðnum tekur sær av løttum í Budapest. Út at eta við íslendingum í kvøld, og so kanska inn at síggja síðstu finalur í morgin. Føroyska ferðaliðið minus Pál kemur heim aftur mánakvøldið 16. august.

Vegna Svimjisamband Føroya

Rókur í Jákupsstovu

Budapest

Pál Joensen gjørdist í gjár nummar fimm í finaluni á evropameistarastevnuni í Budapest, við fimtbestu tíð í heiminum í ár. Tíðin 7:53.11 rakk til eitt flott føroyskt met, og Pál megnaði sostatt at betra seg í báðum EM kappingum sum hann luttók í.

Pál beint áðrenn 800 metra frí finaluna

Finalan varð eitt brak av eini kapping, har Pál Joensen og Mads Glæsner løgdu harðast út, við tíðum undir 56 sekund teir fyrstu 100 metrarnar, og undir 1:55 teir fyrstu 200. Teir megnaðu tó ikki at rysta Rouault, Kubusch og Pizzetti av sær, og umleið við teir 200 svaraðu hesir so aftur, og byrjaðu at draga frá. Pál Joensen var enn fremst við 250 metrar, men dragnaði so spakuliga eitt sindur afturum, til at enda sum nummar fimm av teimum átta í finaluni.

Tíðin hjá honum er tó avbera góð, tá ið hugsað verður um at allir hesir fimm fyrstu svomu skjótari enn nakar annar hevur gjørt til nú í ár, í øllum heiminum. Fýra teir fremstu svomu undir stevnumetið á 1:51.94 frá seinasta EM í Eindhoven í 2008, og Pál var heldur ikki so langt frá teirri tíðini. Tað kostaði nokk nakað at kempa við Mads Glæsner í fyrstuni, omaná dystin ímóti Rouault í finaluni á 1500 metrum. Men vit kunnu so tá ið saman um kemur fegnast um, at hann hóast hesar dystir kláraði at seta føroyskt met, og at liggja nummar fimm í øllum heiminum.

Endaligu úrslitini í 800 metra frí finaluni::

1 ROUAULT Sebastien FRA 7:48.28 CR
2 KUBUSCH Christian GER 7:49.12
3 PIZZETTI Samuel ITA 7:49.94
4 KIS Gergo HUN 7:51.93
5 JOENSEN Pal FAR 7:53.11
6 COLBERTALDO Federico ITA 7:54.84
7 GLAESNER Mads DEN 7:55.80
8 GYURTA Gergely HUN 7:59.95

Pál hevur nú frí í tíggju dagar, áðrenn hann so smátt byrjar at venja aftur. Tað vil siga í fyrstuni at venja eina ferð um dagin í hylinum, og at venja á landi eisini eina ferð hvønn dag. Útlit eru ikki fyri at hann her og nú fær vant í 50 metra hyli í Føroyum, og avtalur verða tí longu nú gjørdar við íslendingar um at víðka samstarvið við teir, til at kompensera fyri vantandi umstøður í Føroyum.

Vegna Svimjisamband Føroya

Rókur í Jákupsstovu

Budapest

Teir báðir Pauli Ø. Mohr og Pál Joensen svumu báðir fyri Føroyar á evropameistarastevnuni í Budapest í morgun, Pauli í innleiðandi riðlunum av 100 frí, og Pál í innleiðandi riðlunum av 800 frí. Hjá Paula gjørdist tað eitt stórt persónligt met, og hjá Páli rakk tað til finaluna í morgin

Pauli áðrenn 100 frí í Budapest

Continue reading →