Svimjisamband Føroya

Pál Joensen luttekur nú leygardagin 30. til sunnudagin 31. oktober á World Cup í Berlin, har hann í fjør vann silvur í 1500 metra frísvimjing. Hann er í ár styrkismettur at vinna bronsu í 400 metra frísvimjing, og gull í 1500.

Skráin fyri World Cup stevnuna í Berlin:

• Leygardag 30. oktober, innleiðandi riðlar frá kl 08:00 FO tíð, finalur frá kl 14:30
  – Pál skal her svimja innleiðandi 400 frí, í 12. kapping av 17, við 3. bestu tilmeldingartíð
• Sunnudag 31. oktober: Innleiðandi riðlar frá kl 08:00 FO tíð, finalur frá kl 14:30
  – Pál hevur bestu tilmeldingartíð, og fer tí beint í finaluriðilin, sum er fyrst í skránni kl 14:30

Komandi viku luttekur hann eftir somu skipan á World Cup í Moskva, har hann skal svimja 400 frí týsdagin 2. november, og 1500 metra frí mikudagin 3. november. Her er hann forsvarandi meistari í 1500 metra frí, eftir at hava tikið gullið í fjør.

Og leygardagin og sunnudagin 6. og 7. november er so aftur World Cup stevna í Stokkhólm, har Pál svimur eftir somu skipan, og vit hartil fara at kunna fylgja við Biritu Debes og Magnusi Jákupssyni, tá ið tey sleppa at royna seg á World Cup. Pál vann eisini silvur í Stokkhólmi í fjør.

Til ber at síggja World Cup kappingarnar beinleiðis á internetinum, við at vitja www.fina.org:
http://www.fina.org/swcup2010_player_live.htm

Til ber eisini at fylgja við tíðum og millumtíðum beinleiðis á www.omegatiming.com:
http://www.omegatiming.com/livetiming/index.htm

Hesi bæði leinki eru hartil at finna á www.svimjing.com/live, saman við video og myndum frá Jón Bjarnasyni í Berlin, og møguleika at samskifta við leguna í Berlin, umframt við aðrar svimjiáhugaðar føroyingar.

Vegna Svimjisamband Føroya

Rókur í Jákupsstovu

Nú leygardagin og sunnudagin verður stór svimjistevna í Klaksvík, har avgerðin fellur um hvør sum sleppur við á landsliðini til World Cup í Stokkhólm í november, NJM í Kastrup í desember og HM í Dubai í desember.

Til World Cup í Stokkhólmi er føroyska úttøkuskipanin, at teir báðir svimjarar av hvørjum kyni sleppa afturat Páli Joensen til stevnuna, sum megna at svimja bestu tíð av øllum føroyskum svimjarum í sínum kyni, í tíðarskeiðnum frá 1. september til 24. oktober 2010. Besta tíð verður funnin við at nýta FINA stigatalvuna, sum er ein háttur hjá altjóða svimjisambandanum at meta um eitthvørt svimjiúrslit í mun til heimselituna, við at rokna út stig har 1000 stig er heimsstøði.

Í løtuni føra Birita Debes og Magnus Jákupsson hesa kapping, við ávíkavist 734 og 733 stigum frá landsdystinum ímóti Íslandi herfyri, tá ið Birita setti føroyskt met og juniormet í 100 rygg við tíðini 1:03.15, og Magnus føroyskt met og juniormet í 50 firvald við tíðini 24.95.

Pál Joensen luttekur í sínum lagi á somu trimum World Cup stevnum í Berlin, Moskva og Stokkhólmi, har hann í fjør megnaði at vinna gull í Moskva, silvur í Stokkhólmi og silvur í Berlin.

World Cup er ein røð av sjey svimjistevnum, í ár í Rio de Janeiro, Beijing, Singapore, Tokyo, Berlin, Moskva og Stokkhólmi, har svimjarar út yvir at vinna heiður og virðislønir á hvørjari einstakari stevnu, eisini kappast um at vinna flest sigrar á øllum stevnum tilsamans, ið umframt 100.000 dollarar gevur vinnaranum rætt at kalla seg World Cup meistari 2010. Svenska Therese Alshammer førir nú eftir fyrstu 4 stevnurnar greitt kappingina hjá kvinnum, og er tí rættiliga sannlík at vinna pengarnar og heiðurin, tá ið røðin endar heima hjá hennari sjálvari í Stokkhólm.

Tær 3 World Cup stevnurnar við føroyskari luttøku eru:

• World Cup í Berlin tann 30. – 31. oktober 2010
• World Cup í Moskva tann 2. – 3. november 2010
• World Cup í Stokkhólm tann 6. – 7. november 2010

Til norðurlendsku juniormeistarastevnuna tann 11. til 12. desember eru tey longu eini 8 sum hava klárað kravtíð, umframt nøkur afturat sum eru nær kravtíðunum. Serliga á gentusíðuni eru tær nógvar um boðið, so at føroyska luttøkan verður í nærum øllum greinum, og við rættiliga góðum stafettum eisini. Tað verður trupult at vinna á svium og dønum, men har skuldi verið góður kjansur fyri føroyskum metum og juniormetum.

Til heimsmeistarastevnuna á stuttgeil í Dubai tann 15. til 19. desember er tað enn bara Pál Joensen sum hevur klárað kravtíð, um enn onnur eru nær kravtíðunum. Hetta er sum kunnugt stóra málið hjá Páli í ár, og ein spennandi avbjóðing í umstøðum sum sambært fyriskiparunum verða glæsiligari enn nakrantíð, í spildurnýggju svimjihøllini í Dubai, sum hevur kostað einar 300 milliónir US dollarar at byggja.

Kapping í Klaksvík verður sum sagt leygardag og sunnudag, við fylgjandi tíðarskrá:

• Leygarmorgun 23. oktober kapping frá kl 10:00
• Leygardag 23. oktober kapping frá kl 16:00
• Sunnudag 24. oktober kapping frá kl 14:30

Vit skulu nokk vænta okkum góð úrslit har norðuri, soleiðis sum svimjararnir svumu á landsdystinum herfyri. Onkur eru kanska eitt sindur moyr eftir venjingarlegu í Íslandi í heystferiuni, og hvíla seg heldur ikki fult út til hesa úttøkustevnu, nú tey eru rættiliga trygg at sleppa við til uttanlanda avbjóðingar í november og desember. Men har er tó enn so mikið nógv upp á spæl, at tað ikki hevði verið løgið um okkurt met varð sett í Klaksvík nú í vikuskiftinum, til at tryggja luttøku á World Cup ella HM.

Vegna Svimjisamband Føroya

Rókur í Jákupsstovu

Tað gjørdist ein rættiliga greiður sigur til íslendingar í ár, tá ið landsdystur var í Laugardalslaug svimjihøllini í Reykjavík, leygardagin, millum Føroyar og Ísland. 98 stig ímoti 80, har føroyingar í fjør vunnu við 101 stigum ímóti 79, men tó á ongan hátt so at føroyingar nú smokkaðu niður í millum. Magnus Jákupsson og Birita Debes settu føroysk met og juniormet í ávíkavist 50 firvald og 100 rygg, og Astrið Foldarskarð og Jón Hofgaard settu hartil juniormet í 50 firvald og 100 metra bringusvimjing.

Continue reading →

Sekstan føroyskir svimjarar fara leygardagin hin 9. oktober kl. 16:00 at kappast á næsta landsdysti ímóti Íslandi, í Laugardalslaug svimjihøllini í Reykjavík. Afturat teimum fara 10 aðrir føroyskir svimjarar við yvir á venjingarlegu, at venja 7 dagar á stuttgeil og langgeil, sum fyrireiking til altjóða kapping.

Continue reading →

Svimjisamband Føroya ætlar í heystferiuni 8. til 15. oktober at senda 26 svimjarar til Íslands, at kappast og venja á stuttgeil og langgeil. 16 av hesum vórðu tikin út á úttøkustevnuni í vikuskiftinum, at umboða Føroyar í landsdysti ímóti Íslandi tann 9. oktober, og hini 10 eru síðani vald út til eisini at luttaka á eftirfylgjandi venjingarleguni, sum fyrireiking til altjóða avbjóðingar.

Tey 16 til landsdystin eru:

• Guðrun Mortensen, Tanja Skaalum, Helena Sævarsdóttir, Pál Joensen, Jón Hofgaard og Eyðbjørn Joensen úr Suðuroyar Svimjifelag
• Turið S. Christiansen, Bjarni M. Petersen og Heðin L. Olsen úr Ægir
• Guðrun Holm Jacobsen, Magnus Jákupsson og Dánjal Hestoy úr Havnar Svimjifelag
• Birita Debes og Astrið Foldarskarð úr FLOT
• Jonna B. Thomsen og Jóhann Heðinsson úr Fuglafjarðar Svimjifelag.

Tey 10 eyka eru:

• Cecilia Eysturdal úr Ægir, Erna Katrin Olsen úr Suðuroyar Svimjifelag og Poula Ø. Mohr úr Fuglafjarðar Svimjifelag, sum hava klárað kravtíð til norðurlendsku juniormeistara- stevnuna (NJM) í desember
• Sofus Bech úr Suðuroyar Svimjifelag, Eva Trygvadóttir úr Ægir og Edit Dahl úr Havnar Svimjifelag, sum eru nær at klára kravtíð til NJM
• Sigmund Mørkøre úr Ægir, Óli Mortensen úr Havnar Svimjifelag, Alvi Hjelm úr Ægir og Markus Joensen úr Havnar Svimjifelag, sum venja fram ímóti norðurlendsku meistarastevnuna fyri ung (NMU) í 2012.

Venjingarlegan í Íslandi er liður í áhaldandi arbeiðnum hjá Svimjisambandi Føroya, at bøta upp á væntandi venjingarumstøður her heima. Hon verður bæði á 25 og 50 metrar geil, eftir umbøn frá venjarunum, av tí at báðar hyljalongdir hava týdning fyri optimala venjing.

Høvuðsvenjarar á leguni verða Petur Heðin á Fløtti úr Ægir og Jón Bjarnason úr Suðuroyar Svimjifelag. Ferðaleiðarar verða Niels Pauli Eysturberg og Eyðun Húsgarð, sum umboð fyri starvsnevnd SSF, og hartil koma Marit Skaalum og Súsanna Mortensen.

Ferðaliðið fer úr Føroyum fríggjadagin 8. oktober, og kemur heim aftur fríggjadagin 15. oktober. Landsdysturin ímóti Íslandi verður leygardagin 9. oktober, í Íslandi, eftir sama leisti sum í Føroyum í fjør, men við eini eitt sindur ørvísi kappingarskrá. Meira verður at frætta um landsdystin, so hvørt sum hann nærkast.

Vegna Svimjisamband Føroya

Rókur í Jákupsstovu

Pauli Ø. Mohr megnaði aftur í dag at upp til sína bestu tíð, hesu ferð í 50 metra frí, og hevur sostatt saman við Páli betrað seg í øllum sum føroyingar yvirhøvur svomu í Budapest. Hetta er einastandandi úrslit, tá ið hugsað verður um at superdraktirnar nú eru burtur, og at flestu av hinum londunum tí hava stórar trupulleikar við at liva upp til gomul úrslit.

Føroyska liðið við hylin í Budapest

Pauli svam teir 50 metrarnar uppá 24.68 sekund, har hann fyrr hevur svomið 24.94 í svimjibuksum, og 24.68 í superdrakt. Pauli svam sostatt nágreiniliga somu tíð sum á evropeisku juniormeistarastevnuni í Prag í fjør, men hesu ferð í stuttibuksum. Ein tangering av síni bestu tíð í síni bestu grein, hóast flestu aðrir svimjarar í heiminum taka til takkar við verri úrslitum.

Saman um tikið svumu teir báðir 6 ferðir í Budapest; Pauli í 50 firvald, 100 frí, 50 bringu og 50 frí, og Pál í 800 og 1500 frí. Hvørja ferð megnaðu teir at svimja bestu tíð ella betur, sum garanterað er eindømi hjá nøkrum landi á stevnuni. Vanliga taka londini nevniliga til takkar við at ein meiriluti av teirra svimjarum kláraði at svimja bestu tíð, men her var tað altso báðir í øllum.

Evropameistarastevnan er av á hesum sinni, tá ið tað kemur til føroyingarnar. Pál Joensen er farin avstað á feriu í nakrar dagar, at kobla so nógv frá svimjingini sum hann nú einaferð kann, meðan restin av liðnum tekur sær av løttum í Budapest. Út at eta við íslendingum í kvøld, og so kanska inn at síggja síðstu finalur í morgin. Føroyska ferðaliðið minus Pál kemur heim aftur mánakvøldið 16. august.

Vegna Svimjisamband Føroya

Rókur í Jákupsstovu

Budapest