Dansk Svømmeunion hevur í morgun kunngjørt kravtíðarskipanina til Olympisku Leikir í Tokyo 2020, ið sum kunnugt eisini er galdandi fyri teir føroyingar sum ætla sær til OL 2020. Sí svoem.org
Serliga nevnivert er at HM 2019 í Gwangju ikki er kravtíðarstevna til OL, og eiheldur EM í Budapest í mai 2020, men í staðin bara Danish Open 2020 og Swim Open Stockholm 2020 í mars/apríl 2020.
Donsku kravtíðirnar til OL 2020
| Einstaklingar | Menn | Kvinnur |
| 50 frí | 00:22.01 | 00:24.77 |
| 100 frí | 00:48.57 | 00:54.38 |
| 200 frí | 01:47.02 | 01:57.28 |
| 400 frí | 03:46.78 | 04:07.90 |
| 800 frí | 07:54.31 | 08:33.36 |
| 1500 frí | 15:00.99 | 16:32.04 |
| 100 rygg | 00:53.85 | 01:00.25 |
| 200 rygg | 01:57.50 | 02:10.39 |
| 100 bringa | 00:59.93 | 01:07.07 |
| 200 bringa | 02:10.35 | 02:25.52 |
| 100 firvald | 00:51.96 | 00:57.92 |
| 200 firvald | 01:56.48 | 02:08.43 |
| 200 blandað | 01:59.67 | 02:12.56 |
| 400 blandað | 04:15.84 | 04:38.53 |
SSF og ÍSF vóru til OL í 2012 hoyringspartur í sambandi við donsku kravtíðarskipanina, men var hesin rættur gloymdur til OL í 2016, og síðani sleptur til OL 2020. Tí er tað fyrst nú at vit í SSF kenna skipanina.
Tí eru vit eisini í teirri heldur løgnu støðu, at hóast FM á langgeil 2019 er góðkend av altjóða svimjisambandinum FINA sum úttøkustevna til OL 2020, so ber ikki til hjá okkum ella dønum at royna har.
Kravtíðirnar skulu klárast á einari av hasum báðum stevnum, og tað er tí líkamikið um svomið verður líka skjótt ella skjótari á øðrum stevnum í kravtíðarskeiðnum hjá FINA frá 1. mars 2019 til 29. juni 2020, íroknað á nevndu HM og EM.
Og, kravtíðirnar hjá dønum eru í flestu førum væl harðari enn tær A-kravtíðir sum FINA hevur ásett til OL 2020, og tá sjálvsagt nógv harðari enn B-kravtíðirnar sum eru ætlaðar til lond sum Føroyar.
Hetta er sum so einki at gera við, soleiðis sum støðan er, og mugu føroysku svimjararnir tí bara royna tað teir kunnu, til at klára donsku kravtíðirnar. Soleiðis sum vit eisini væntaðu.
Men, føroyski OL-limaskapurin kann ikki koma nóg skjótt.
